विश्वकै ठूलो फुटबल बुट आज साँझ ६ः३० बजे कतारा कल्चरल भिलेजमा अनावरण गरिने भएको छ ।
कतार पब्लिक डिप्लोमेसीको सहकार्यमा अग्रणी अन्तर्राष्ट्रिय युवा संगठन फोकस इन्टरनेशनलले आयोजना गरेको कार्यक्रममा कतार राज्यका लागि भारतीय राजदूत डा. दीपक मित्तल प्रमुख अतिथि रहनेछन् ।
कतारा कल्चरल भिलेज फाउन्डेसनका महाप्रबन्धक प्रा. डा. खालिद बिन इब्राहिम अल सुलैती, भारतीय सांस्कृतिक केन्द्र (आईसीसी) अध्यक्ष पीएन बाबुराजन, कतारा पब्लिक डिप्लोमेसी सेन्टरका सीईओ र ग्लोबल पब्लिक डिप्लोम्याटिक नेटवर्कका महासचिव इन्जिनियर दर्विश अहमद अल शैबानी, गिनिज वल्र्ड रेकर्ड होल्डर र बिग बुटको क्युरेटर एम डिलिफ, फोकस इन्टरनेशनलका प्रमुख कार्यकारी अधिकृत समीर भलियाभेट्टिललगायत विभिन्न सामाजिक–सांस्कृतिक क्षेत्रका प्रमुख अतिथिहरुको सहभागिता कार्यक्रममा रहनेछ ।
फुटबललाई राष्ट्र र नागरिकबीच विश्वव्यापी भ्रातृत्व ल्याउने खेलको रूपमा उजागर गर्न कतारको प्रयासप्रति ऐक्यबद्धता व्यक्त गर्ने उद्देश्यले प्रदर्शनी आयोजना गरिएको छ।
