मिडिया र ट्राफिक सचेतना विभागका सहायक निर्देशक कर्नल जबेर मोहम्मद रशिद ओडाइबाले ट्राफिक महानिर्देशनालयले देशमा डेलिभरी बाइक दुर्घटना कसरी कम गर्ने भन्ने बारे कार्यशाला आयोजना गरेको बताएका छन् ।
सोमबार कतार रेडियोमा बोल्दै कर्नल ओडाइबाले डेलिभरी बाइकको सङ्ख्या बढेको कुरा सबैलाई अवगत भएको र अर्थतन्त्रका लागि राम्रो भएता पनि पछिल्लो समय दुर्घटना एकदम बढेको तथ्याङ्कले देखाएकाले दुर्घटनाका कारणहरू पत्ता लगाउन र समस्याको समाधान प्रदान गर्न कार्यशाला आवश्यक रहेको बताए ।
अवलोकन र ट्राफिक विभाग र हमाद मेडिकल कर्पोरेसनको अघिल्लो कार्यशालाको आधारमा यी दुर्घटनाहरूको मुख्य कारणहरूमध्ये डेलिभरी स्थान पत्ता लगाउन मोबाइल एप मार्फत गाडी चलाउँदा फोनमा ध्यान केन्द्रित भएको देखिएको उनले बताएका छन्।
सन् २०२२ को पहिलो त्रैमासिकमा हमाद ट्रमा सेन्टरबाट गम्भीर चोटपटक लागेका मोटरसाइकल डेलिभरी चालकको संख्या सन् २०२१ मा सोही अवधिमा उपचार गरिएको संख्याको तुलनामा तीन गुणा बढेको छ।
हमाद ट्रमा सेन्टरले २०२२ को पहिलो त्रैमासिकमा गम्भीर चोटपटक लागेका मोटरसाइकल डेलिभरी चालकको ९३ केसलाई उपचार तथा हेरचाह प्रदान गरेको छ, जुन २०२१ को सोही अवधिमा २९ घटना मात्र रहेको कर्नल ओडाइबाले बताए ।
श्राेत : The Peninsula
